ЦАРАЙЛАГ БАЙХ НУУЦ БОЛ ҮЗЭСГЭЛЭНТЭЙ СОРМУУС


Х. Болормаа | YOLO.MN
2022-03-02

Маск зүүхгүй л бол гарж болдоггүй цаг үед бид нар амьдарсаар аль хэдийн дасжээ. Ямар ч хүйсний хүн харц булаам сормуустай л бол маскаа тайлахгүйгээр хэнийг ч өөртөө дурлуулж чадна гэхэд хэлсдэхгүй үе мэт. Иймээс өнөөдрийн нийтлэлээрээ сормуусаа хэрхэн эрүүл байлгах тухай хүргэх болно.

Урт, дэрвэгэр, өтгөн сормуусны ачаар харц тодорч, нүд томорч харагддаг тул хүн бүр ийм сормуусыг хүсдэг. Тэр тусмаа урт, өтгөн сормуус нь гаднах сөрөг нөлөө буюу тоос, шороо болон хөлснөөс хамгаалдаг онцлогтой. Тийм ч учраас сормуусны эрүүл байдал бидэнд маш чухал юм. Аминдэмийн дутагдал болон стресснээс үүдэн сормуус унах нь элбэг тохиодог бөгөөд зарим тохиолдолд дахин ургах үйл явц нь бүрмөсөн зогсох үе ч бий. Хэрвээ та эдгээр асуудлуудтай тулгарсан бол даруйхан өөрийн эрүүл мэнддээ анхаарч, асуудлыг шийдэх хэрэгтэй гэдгийг санаарай. Харин бид энэ удаад сормуус унахад нөлөөлдөг гол шалтгаануудыг бэлтгэсэн тул анхааралтай уншиж, арга хэмжээ авахыг зөвлөж байна.

ШАЛТГААН 1: Амин дэмийн дутагдал

Хэрэв та тогтмол хатуу хоолны дэглэм туршиж, тэнцвэргүй хооллож, удаан хугацаагаар өлсгөлөн явах зэрэг муу зуршлуудтай бол энэ нь мэдээжийн хэрэг биеийг тань ядаргаанд оруулж, улмаар шим тэжээл, аминдэмийн дутагдалд оруулдаг. Аминдэмийн дутагдал нь ихэнхдээ үс уналт, арьс болон хумсны чанар муудах зэрэг таагүй шинж тэмдгээр илэрдэг юм. Сормуусыг эрүүл ургуулахын тулд хүн өдөр тутамдаа биед хэрэгцээтэй төмөр, магни, А, В, Е төрлийн витамин болон биотинийг хэрэглэж занших хэрэгтэй. Мөн хоол хүнсэндээ түлхүү байгалийн эрүүл бүтээгдэхүүнүүд оруулахыг мэргэжилтнүүд зөвлөдөг. Шинэхэн ногоо, жимс, загас, мах, самар зэргийг тогтмол хэрэглэж байх хэрэгтэй юм шүү.

ШАЛТГААН 2: Арьсны өвчин

Тодорхой хэдэн төрлийн арьсны өвчин нь сормуус унахад нөлөөлж буй ноцтой шалтгаан байж болзошгүй юм. Нейродерматит, герпес, хайрст үлд буюу псориаз болон зовхины орчим үүсдэг бусад арьсны өвчнүүд нь таагүй мэдрэмж үүсгэж, нүдний хавьцаа арьс загатнаж эхэлдэг бөгөөд хүн өөрийн эрхгүй гараараа нүдээ хүчтэй үрдэг. Иймэрхүү хүчтэй хөдөлгөөн нь сормуусыг унахад нөлөөлөх нь гарцаагүй. Хэрэв таны нүдний орчим загатнаж, улайсан байгаа бол цаг алдалгүй мэргэжлийн эмчид хандах нь зүйтэй. Хэсэг хугацаанд нүүрээ будахаас татгалзаж, зөвхөн харшил үүсгэдэггүй, зөөлөн бүтэцтэй бүтээгдэхүүн хэрэглээрэй.

ШАЛТГААН 3: Дааврын тэнцвэргүй байдал

Даавар нь бидний бие организмд маш чухал үүргийг гүйцэтгэдэг. Сэтгэл санаа, ерөнхий эрүүл мэндийн байдал, хүний зан араншин гээд маш олон зүйл даавраас шалтгаалдаг. Дааврын тэнцвэргүй байдлаас үүдэн хүний биеийн хамгаалалтын функц алдагдаж, улмаар аминдэмийн дутагдалд ордог нь сормуус унахад шууд нөлөөлдөг байна. Гэхдээ даавраас үүдэлтэй үс уналт нь түр хугацааных гэдгийг санах хэрэгтэй. Гол нь өөрөө дур мэдэн эм, эмчилгээ хийж болохгүй тул эмчид хандах нь зөв шийдвэр юм.

ШАЛТГААН 4: Сормуус дэрвийлгэгчийг буруу ашигласан тохиолдолд

Дэрвэгэр сормууны нууц ихэнх хүнийх механик сормуус дэрвийлгэгч юм. Гэтэл буруу хэрэглээ, хэтэрхий их хугарал нь таны харц булаам байдлыг эвдэж магадгүй тул жаахан болгоомжтой ашиглаж хэвшихийг хүсье. Мөн мэдээж боломжтой бол чанартай сормуус дэрвийлгэгч ашиглахыг зөвлөе.

ШАЛТГААН 5: Чанаргүй сормуусны будаг

Чанаргүй орц найрлагатай сормуусны будаг нь нүдний салст бүрхэвч, арьсанд харшлах хандлагатай байдаг тул энэ нь сормуус унахад ч мөн нөлөөлдөг. Шинэ будаг сонгохдоо шошгыг нь анхааралтай уншиж, хортой химийн найрлага тус бүтээгдэхүүний орцод орсон эсэхийг шалгаж байгаарай. Мөн сормуусны будгаа 2-4 сард шинэчилж байхыг гоо сайхны мэргэжилтнүүд анхааруулж байна. Түүнчлэн бүхэл өдрийн турш химийн найрлагатай сормуусны будаг түрхэж, эсвэл сормуус суулгах байдлаар бид сормуусандаа хайр найргүй ханддаг тул сормуусаа хамгаалж, эрүүлжүүлэх бүтээгдэхүүн хэрэглэх нь их чухал.

#Гоо сайхан #Эрүүл мэнд