Б.ХОНГОРЖИН: ЖААХАН ХИЧЭЭХ ТӨДИЙД Л БОЛОМЖ ӨӨРӨӨ ТОДРОН ГАРЧ ИРДЭГ


YOLO.mn | YOLO.MN
2022-11-21

Өөрийн сурч мэдсэн зүйлээ бусадтай хуваалцах чин хүсэлтэй, нийгэмд өөрийн хувь нэмрээ оруулах мөрөөдөлтэй олон залуусын төлөөлөл болсон Б.Хонгоржинтой түүний бичсэн ном болон туршлагынх нь талаар ярилцлаа.


- Сайн байна уу? Манай уншигчдад өөрийгөө танилцуулаад яриагаа эхлэх үү?

- Сайн байна уу? Намайг Бат-Эрдэнийн Хонгоржин гэдэг. Мөрөөдөл гэрэлтдэг төслийн үүсгэн байгуулагч, өсвөр насны хүүхдэд зориулсан DREAM GLOW номын зохиогч. 

- Dream Glow номныхоо талаар дэлгэрэнгүй танилцуулбал?

- Ахлах ангид сурч байхдаа зуныхаа амралтаар бичсэн юм. Тухайн үед надад ном бичих хэд хэдэн шалтгаан байсан боловч нэг зүйл хамгийн ихээр нөлөөлсөн. Энэ нь өөрийн болон үеийнхнийхээ өсвөр насанд тулгарч байсан хүндрэл бэрхшээл, сорилт бүрийг хэрхэн даван туулсан арга зам, түүхээ бусадтай хуваалцаж, хүрэх замын асуудалгүй байлгах юм сан гэсэн чин хүсэл байв. Иймээс ч номондоо өсвөр насны хүүхдийн эзэмшвэл зохих чадвар болох бие даан суралцах чадвар, дасан зохицох чадвар, харилцааны ур чадвар мөн түүнчлэн дадал зуршлын талаар түлхүү бичсэн.

- Ном бичихдээ хэн нэгнээс зөвлөгөө дэмжлэг авсан уу? Хамгийн эхлээд номоо хэнд уншуулсан бэ?

- Тухайн үед цар тахлын улмаас хөл хорионы хүндхэн үе таарсан хэдий ч гэртээ төвлөрч суугаад юм бичих нь таатай байсан. Номоо хэд хэдэн удаа найруулан бичиж ноороглосны дараагаар хамгийн эхлээд гэрийнхэндээ уншуулж зөвлөгөө авсан. Тэд миний зарим түүхүүдийг сануулж өгөхөөс гадна хэрэгтэй гэсэн санаануудыг хэлж өгч байсан. Мөн дүү нартайгаа ярилцаж өсвөр насанд тулгарч байгаа бэрхшээл асуудлын сонссоноор номоо нэмж баяжуулж бичихэд илүү дөхөм болсон.

Миний хувьд ном бичиж эхлүүлнэ гэдэг хүндхэн даваа байсан хэдий ч өөрийн санааг өөрийн үгээр хүргэхийг хичээж ажилласан. Номныхоо дизайныг өөрөө гаргаж, мөн өөрөө найруулан бичиж, дүрмийн алдаа засах гээд үр дүнд нь олон зүйлийг сурч мэдэж авсан. 

- Ном бичихэд нэлээд олон шалтгаан байсан гэж түрүүн хэллээ. Энэ талаар сонирхуулж болох уу?

- Бага байхаасаа эхлээд ном бичих сонирхолтой хүүхэд байсан. Дунд ангид байхдаа би зуныхаа амралтаар ном бичиж байсан юм. Дүү бид хоёрын хөгжилтэй түүхийг өгүүлсэн бяцхан ном байсан. Харин найз маань дүү бид хоёрыг хүүхэлдэйн дүрд оруулж маш гоёор зурж өгч байсан түүхтэй. 

Харин дараагийн шалтгаан гэвэл миний хувьд арван жилд сурч байхдаа хичээлийнхээ хажуугаар хүүхдүүдэд төрөл бүрийн хичээл заадаг байсантай холбоотой байв. Олон жил хичээл заасан. Ялангуяа цар тахлын үеэр хотоос зайдуу амьдардаг хүүхдүүдэд хичээл зааж байхдаа тэдэнд тулгамдсан асуудлуудад боловсролоор дамжуулж туслах хэрэгтэй юм байна гэсэн бодол үргэлж төрдөг байлаа.  

Ийнхүү ахлах ангидаа илтгэлийн тэмцээнд боловсролын асуудлаар илтгэл тавин оролцож, тэмцээний шагналын мөнгөөр олон хүүхдэд туслах үүднээс ном бичих санаагаа шууд хэрэгжүүлсэн. Ингээд л тэмцээний маргааш өдөр нь номныхоо эхний бүлгийг бичиж байсан түүхтэй.


- Хүүхдүүдэд ямар төрлийн хичээл заадаг вэ?

- Ялангуяа хотоос зайдуу амьдардаг хүүхдүүдийн хувьд дугуйланд хамрагдах боломж бага байдгийн улмаас эдгээр хүүхдүүдэд англи хэл, чөлөөт бүжгийн хичээл зааж эхэлсэн. Харин цар тахлын улмаас танхимын хичээлээ онлайнд шилжүүлж хоёр жилийн хугацаанд дунд ангийн сурагчдад хичээлийн хоцрогдлын арилгаж тэдэнд туслах үүднээс академик хичээлүүдийг түлхүү заадаг болсон. Харин одоогоор илүү ахлах ангийн сурагчдад зориулсан арга хэмжээ зохион байгуулж байна.

- Их сонирхолтой түүх байна. Номоо яагаад Dream Glow гэж нэрлэсэн юм бэ?

- Хүүхэд бүрийн мөрөөдөл нь гэрэлтдэг байгаасай гэж хүсэн номоо ийнхүү нэрлэсэн. Хүүхэд бүр сурч боловсрох энэ гайхалтай цаг хугацааг хамгийн сайнаараа үр дүнтэй өнгөрүүлж, мөрөөдлөө улам ихээр гэрэлтүүлээрэй гэсэн санааг дүү нартаа өөрийн номоор дамжуулж хүргэхийг хүссэн. Олон хүмүүс надаас англи хэл дээр бичигдсэн ном юм уу гэж асуусан байсан. Dream Glow ном нь монгол хэлээр бичигдсэн ном юм. 

- Хүүхдүүдээс гадна эцэг эхчүүдэд зориулсан зөвлөгөө оруулсан нь их сонирхолтой санагдлаа.

- Номоо хүүхдүүдээс гадна эцэг эхчүүдэд зориулан бичсэн. Хүүхэд насанд өөрийн үнэлэмж нь гэр бүлийн гишүүд өөрийг нь хэрхэн хүндэлж байгааг мэдрэхээс эхэлж бий болдог тухай уншиж байсан юм. Иймээс гэр бүлийн гишүүдийн хоорондын харилцаа, хандлага, түүнийг дэмжих нь хүүхдийн суурь хүмүүжилд хамгийн ихээр нөлөөлөөд зогсохгүй амжилтад нь хүртэл маш томоор нөлөө үзүүлсээр байдаг тухай номондоо оруулж бичсэн. 

- Ном уншихын давуу талыг чи юу гэж боддог вэ? Энэ талаар үеийнхэнтэйгээ бас ярилцдаг байх.

- Миний бодлоор номноос олон мэдлэг мэдээллийг өөртөө шингээж авна гэдэг нь маш том боломж юм. Ном их уншдаг хүний төсөөлөх, төвлөрөх, харилцах гээд маш олон чадварууд нэмэгдэхээс гадна бүтээлч байдал ч илүү ихээр хөгжсөн байдаг. Ийнхүү тоочоод байвал ном уншихын давуу талууд маш их. Нэг ёсны тархины дасгал гэж ойлгодог.

Харин “Dream Glow Book” пэйжээр дамжуулж хүүхдүүдээс номтой холбоотой асуултууд цөөнгүй ирдэг. Ном уншина гэдэг нь тийм ч уйтгартай нойр хүргэмээр ажил биш юм. Гол нь өөрийн сонирхлын дагуу номоо уншаад сурчихвал аяндаа дадал зуршил үүсэж улмаар асуудал багасдаг. Харин гадаад хэл дээр уншиж байгаа эхэн үедээ өөртөө аль болох сонирхолтой, хялбар номнуудаас уншиж байгаад сэдвээ хүндрүүлээд цааш явбал илүү тохиромжтой гэж зөвлөдөг.


- Өөрийгөө олж нээхийн тулд олон зүйлийг оролдож, туршиж үзэхийг зөвлөсөн байсан.

- Өөрийнхөө юунд дуртай, юунд илүү сонирхолтойг олж мэдэхийн тулд олон зүйлийг оролдоод үзэхэд алдах юм байхгүй, харин ч туршлага, чадвар болж үлдэнэ. Хүүхдүүдийн хувьд ялангуяа дунд ангид сурч байхдаа хувийн сонирхлоо олоход өөрийгөө зориулж, эрт эхлүүлбэл илүү үр дүнтэй харагддаг. Магадгүй эхний оролдлогоор дуртай зүйлээ олсон бол дараагийн оролдлогыг хийхэд ч  буруутах зүйл байхгүй гэж хэлнэ. Хожим харамсахгүйн тулд оролдоод үзэх л хэрэгтэй. Аливаа зүйлийг хийж оролдож байж л чадахгүй зүйлээ чаддаг болно бас сонирхолтой ч болно. 

Нөгөө талаас чадвар туршлага нэмэгдэхийн хэрээр  ирээдүйд юу хийх, ямар мэргэжилтэй хүн болох нь илүү тодорхой болоод ирнэ гэсэн санааг номондоо бичиж оруулсан.

- Туслахын хариуд урамших мэдрэмж үнэхээр сайхан гэж бичжээ. Сайн дурын ажлын юу нь чамайг илүү ихээр татаж нөлөөлсөн бэ? 

- Сайн дурын ажил гэхээр цалингүй, дуртай цагтаа хийдэг, аль эсвэл цаг заваа дэмий зүйлд зарцуулдаг гэсэн ойлголтууд битгий байгаасай гэж миний хувьд хүсдэг. Ялангуяа өсвөр насны хүүхдүүдийн хувьд сайн дурын ажил хийснээр өөрийгөө таньж мэдэх, өөрийгөө шинээр нээхэд илүү ихээр тэдэнд тусалдаг. Үүнийг би өөр дээрээ, бас найзууд үеийнхнээсээ олж харсан. 

Олон төрлийн хүмүүстэй уулзаж амьдралын олон янзын өнгийг харж, тэдэнд тусалснаар асуудлыг даван туулах чадвар нэмэгддэг. Мөн энгийн жижиг зүйлээс ч урам зориг аз жаргалыг мэдэрч чаддаг болно. Ингээд тоочоод байвал сайн дурын ажлаас мөнгөтэй харьцуулшгүй үнэтэй туршлагыг олж авах боломжтой байдаг. 

- Номыг хаанаас унших боломжтой вэ?

- Олон хүүхдэд унших боломжийг бүрдүүлэх үүднээс Улсын төв номын сан, Нацагдоржийн номын сан болон Хүүхдийн төв номын сан гээд улсын томоохон номын сангуудад номоо бэлэглэсэн. Харин цөөн тооны номыг Интерномын дэлгүүрээр борлуулж байна. Номынхоо орлогыг хүүхдүүдийн боловсролд зориулна.  

Цаашид аль болох сургуулийн номын сангуудад номоо байршуулж олон хүүхдийн хүртээл болоосой гэж хүсэж байна. Одоогийн байдлаар аль болох орон нутгийн сургуулиуд руу чиглэж ном тараах ажлаа эхлүүлээд байна. Саяхан Сэлэнгэ аймгийн Мандал сумын сургуулиудад очиж номоо бэлэглэсэн. Ийнхүү очихдоо  ахлах ангийн сурагчдад зориулсан арга хэмжээг мөн зохион байгуулсан. 


 - Чиний хувьд чөлөөт цагаа хэрхэн өнгөрүүлдэг вэ?

- Миний хувьд чөлөөт цагаараа бүжиглэх дуртай. Бүр бага байхаасаа л бүжиглэж эхэлсэн болохоор бүжиг надад маш үнэ цэнтэй санагддаг юм. Мөн чөлөөт цагаараа найзуудтайгаа цагийг хөгжилтэй өнгөрүүлж кино үзэх гоё байдаг. Шинээр хоол хийж сурах, хоолоо өөрөө зохиож хийх дуртай. Ер нь шинэ зүйлийг туршиж үзэх их дуртай.

- Чиний хувьд боловсролтой холбоотой олон ажлуудыг санаачлан хийжээ. Үүнийг хийх гол шалтгаан нь юу байсан бэ? 

- Олон хүүхдүүдтэй уулзан хүрээллээ тэлэх тусам өөрөө ч мэдэлгүй боловсролын асуудал руу илүү түлхүү анхаарч, асуудлыг шийдвэрлэх хүсэлтэй хүн болсон байсан. Энэ бүхнийг хийснээр боловсрол хамгийн чухал болохыг үргэлж мэдэрдэг. Миний бодлоор нийгэмд байгаа олон асуудлуудын үндэс суурийг хувь хүний боловсрол, хүмүүжил, төлөвшил гэж үзвэл асуудлыг шийдвэрлэх бүх юмны үндэс суурь нь яахын аргагүй боловсрол гэж ойлгодог. 

- Чиний хувьд арван жилийн дүү нартаа зориулж ямар зөвлөгөө өгөх вэ?

- Амжилт хийсэн зүйлтэй чинь үргэлж холбоотой байдаг. Иймд зорилго мөрөөдөлдөө хүрэх арга зам чинь зөвхөн чиний хэр их хичээл зүтгэл, хэр их цаг хугацаа зарцуулсантай шууд холбоотой байх болно гэж зөвлөмөөр байна. Мөн эерэг зөв харилцаа хандлагатай байгаарай. Хандлага өөрчлөгдсөн цагт бүх зүйл дагаад өөрчлөгддөг. 

- Урилга хүлээн авч ярилцсанд баярлалаа. Чиний ирээдүйн зорилго мөрөөдөлд нь өндрөөс өндөр амжилт хүсье.

- Баярлалаа. Танд ч мөн адил хамгийн сайн сайхан бүхнийг хүсье.

#Ярилцлага