KATSEYE хамтлагийн Манон гэж хэн бэ?

Дэлхийн хөгжмийн зах зээлд хүч түрэн орж ирж буй "Katseye" хамтлаг залуусын анхаарлыг ихээр татах болсон билээ. Тэр дундаа өвөрмөц төрх, хүчирхэг хоолойгоороо ялгарч буй гишүүн бол Манон юм.

Yolo.mn-ийн уншигчдадаа зориулан Маноны тухай сонирхолтой баримтуудыг хүргэж байна. 

МАНОНЫ ТОВЧ ТАНИЛЦУУЛГА

Бүтэн нэр: Meret Manon Sarpong Bannerman
Төрсөн он, сар, өдөр: 2002 оны 6 дугаар сарын 26
Орд: Мэлхий
Гарал үүсэл: Швейцар (Аав нь Гана, ээж нь Швейцар-Итали гаралтай)
Хамтлаг дахь үүрэг: дуучин, загвар өмсөгч (Тэрээр хамтлагийнхаа хамгийн ахмад гишүүн бөгөөд "Visual" болон хоолойн өвөрмөц өнгөөрөө алдартай)
Сошиал хаяг: @meretmanon 

ГУРВАН УЛСЫН СОЁЛЫН НЭГДЭЛ

Маноны жинхэнэ нэрийг Мерет Манон Сарпонг Баннерман гэдэг. Тэрээр 2002 онд Швейцарын Луцерн хотод төрж, Цюрихт өссөн. Түүний аав нь Баруун Африкийн Гана (Акан Фанте гаралтай) хүн бол ээж нь Швейцар-Итали гаралтай бөгөөд энэ нь түүнийг дэлхий ертөнцийг илүү уудам харах нүдтэй болгосон гэж тэрээр дурдсан байдаг. Манон Лена Лоу (Lena Lou) гэх эгчтэй. Тэд хамтдаа Швейцарын Цюрих хотод өсөж торнисон байна. Тэрээр Швейцар-Герман болон Англи хэлээр чөлөөтэй ярьдаг.

"БИ BEYONCÉ ШИГ АЛДАРТАЙ БОЛНО"

Багаасаа тайзан дээр гарахыг мөрөөддөг байсан тэрээр 15 настайдаа төгөлдөр хуур, укулеле тоглож сурч, өөрөө дуу бичиж эхэлжээ. Маноны аав нь түүний тууштай байдал, хүсэл мөрөөдлийг нь хараад алдарт дуучин Бейонсетэй зүйрлэдэг байсан гэнэ. Тэрээр Лос-Анжелест оюутан солилцоогоор сурч байхдаа "Мерет" гэх нэрийг хүмүүс дуудахад хэцүү байсан тул "Манон" гэж нэрлэгдэх болсон байна. 

СОШИАЛ МЕДИАГААС HYBE ХҮРТЭЛ

Манон "Katseye"-д орохоосоо өмнө Instagram болон TikTok дээр загвар өмсөгч, инфлюенсер гэдгээрээ аль хэдийн танигдсан байв. Түүнийг HYBE-ийн кастинг менежер сошиал медиагаас олж харан, "Dream Academy" шоунд урьжээ. Эхэндээ Манон энэ саналыг хуурамч байна гэж бодсон ч, удалгүй бодит болохыг нь мэдээд дэлхийн хэмжээний од болох аялалдаа гарсан юм.

ТҮҮХЭН АМЖИЛТЫН ЭЗЭН

Манон "Dream Academy" шоунд 6-р байрт орж, "Katseye" хамтлагийн гишүүн болсноор дараах түүхэн амжилтуудыг тогтоосон:

HYBE-ийн анхны өнгөт арьст уран бүтээлч: Тэрээр тус энтертайнменттай гэрээ байгуулсан анхны холимог цуст, хар арьст артист болсон юм.

MTV VMA-ийн анхны Швейцар ялагч: 2025 онд түүний хамтлаг "Push Performance of the Year" шагналыг хүртсэнээр Манон энэхүү нэр хүндтэй шагналыг авсан анхны Швейцар эмэгтэй болжээ.

ЗАГВАРЫН ЧИГ ХАНДЛАГА ТОДОРХОЙЛОГЧ

Түүний өвөрмөц хөмсөг засах хэв маяг 2025 онд TikTok-т хүчтэй трэнд болж, олон мянган залуус түүнийг дуурайх болсон.

Мөн тэрээр Hugo Boss, Fendi, Pandora зэрэг дэлхийн брэндүүдтэй хамтран ажиллаж, загварын ертөнцөд өөрийн байр суурийг бататгасаар байна.

Манон "Dream Academy" шоунд оролцохоос өмнө буюу 2020-2022 оны хооронд сошиал медиад хүчээ авч, олон улсын томоохон брэндүүдийн хараанд өртөж эхэлсэн юм. Тэрээр зөвхөн инфлюенсер төдийгүй, мэргэжлийн загвар өмсөгчийн хувиар дараах брэндүүдтэй хамтран ажиллаж байжээ:

Дэлхийн алдартай брэндүүд: Тэрээр Hugo Boss, Fendi, Charles & Keith, Gymshark, болон PacSun зэрэг брэндүүдийн сурталчилгаанд дүр төрхөө мөнхөлж байв.

Гоо сайхны нүүр царай: Dermalogica, Laneige, Glossier зэрэг арьс арчилгаа, гоо сайхны брэндүүд түүний өвөрмөц төрхийг онцлон хамтран ажилласан байдаг.

Мөн тэрээр бусад уран бүтээлчдийн хөгжмийн видео клипүүдэд урилгаар тоглож, жүжиглэх ур чадвараа харуулж байсан туршлагатай. Тухайлбал:

1. Швейцарын дуучин Benjamin Amaru-гийн клипэнд тоглосон.

2. Германы реппер Badchieff-ийн хөгжмийн видео бичлэгт дүр бүтээж байв.

Эдгээр туршлага нь түүнийг "Katseye" хамтлагийн камерын өмнө хамгийн итгэлтэй, мэдрэмжтэй гишүүдийн нэг байхад томоохон нөлөө үзүүлсэн юм. Тэрээр хамтлагт орсныхоо дараа ч Gap, Pandora, Lush зэрэг брэндүүдийн сурталчилгаанд багаараа болон ганцаарчилсан байдлаар оролцсоор байна.