Хүүхэд хэдэн наснаас ямар ажил хийж болохыг та мэдэх үү?

13-15 насны хүүхэд эцэг эх, харгалзан дэмжигчийн зөвшөөрлөөр ажил хийж болно. Гэхдээ эрүүл мэнд, өсөлт хөгжилд нь сөрөг нөлөө үзүүлэхгүй, сурч боловсроход саад учруулахгүй, хөдөлмөрийн аюулгүй байдал, эрүүл ахуйн шаардлага хангасан ажлын байранд хөдөлмөр эрхэлж болно. 

Монгол Улсын Хөдөлмөрийн тухай хуульд зааснаар 18 нас хүрээгүй хүүхдийг шөнийн цагаар, илүү цагаар, амралтын өдөр, баярын өдөр ажиллуулж болохгүй. 

13-15 насны хүнийг дараах нөхцөлд ажиллуулахгүй. Үүнд, 

• Насанд хүрсэн хүний байнгын шууд хяналтгүйгээр,
• Тухайн ажил үүргийг гүйцэтгэхэд шаардлагатай, зохих сургалтад хамруулаагүй, 
• Гэр бүлээс гадуур, нэг өдрөөс дээш, удаан хугацаагаар хол байлгах, ганцаараа эсвэл олон цагаар тусгаарлагдан ажиллуулах, 
• Хүүхдийн хүсэл сонирхлыг харгалзан үзээгүй, хүүхэд өөрөө зөвшөөрөөгүй тохиолдолд. 

13-15 насны хүүхэд өдөрт хэдэн цаг ажиллах боломжтой вэ? 

Хичээлийн үед долоо хоногт 10 цагаас илүүгүй буюу өдөр хоёр цаг, гэр ахуйн ажилд өдөрт нэг цаг, долоо хоногт нийт таван цаг хүртэл ажиллуулж болно. Харин хичээлийн улирлын амралтын үед долоо хоногт 20 цагаас илүүгүй, гэр ахуйн ажилд долоо хоногт найман цаг хүртэл ажиллуулж болно.