Монгол улсын хамгийн өндөр цэгийг дахин тогтоолоо

Монголын хамгийн өндөр уулсын өндрийг орчин үеийн GNSS багаж ашиглан дахин тогтоолоо. Хэмжилтийн ажлыг Газар зохион байгуулалт, геодези, зураг зүйн ерөнхий газар, уулчдын үндэсний холбоо болон мэргэжлийн байгууллагууд хамтран гүйцэтгэсэн байна.

Тус хэмжилтийг 2025 оны найм, есдүгээр сард өндөр нарийвчлалын GNSS багаж ашиглан геодезийн шинэчлэгдсэн хэмжилт хийжээ.

Шинэчилсэн хэмжилтийн үр дүнд:

• Таван Богд уулын өндөр зарим эх сурвалжид 4104, БНМАУ-ын Сайд нарын Зөвлөлийн 1980 оны 149 дүгээр тогтоолд 4082 м гэж батлагдсан байдаг. Харин 2025 оны наймдугаар сарын геодезийн хэмжилтээр Таван Богд уулын оройн цэгийг 4081 м байгааг тодорхойлов.
• Монгол Улсын хамгийн өндөр цэг - Хүйтэн уулын өндөр 4374 м гэж дунд сургуулийн сурах бичгээс эхлүүлэн олон эх сурвалжид тэмдэглэгдсэн байдаг бол бусад эх сурвалжид 4352 м байсан, 2025 оны 8 дугаар сард өндрийг хэмжиж тодорхойлоход 4351 м байжээ. 
• Мөнххайрхан уулын өндрийг БНМАУ-ын Сайд нарын Зөвлөлийн 1980 оны 149 дүгээр тогтоолоор 4204 гэж батлагдсан бол зарим эх сурвалжид 4362 м гэж тэмдэглэгдсэн байсан. Харин 2025 оны 09 дүгээр сарын геодезийн хэмжилтээр 4196 м болох нь тогтоолоо.

Хэмжилтийн ажилд геодезийн зөвлөх инженер О.Хосбаяр, инженерүүд О.Пүрэвдорж, Э.Уранболор нар оролцож, Мөнххайрхан болон Хар Ан ууланд нийт 21 цагийн авиралт хийжээ.

Мөн уулын нэршлийг буруу ашиглаж буй асуудлыг залруулахын тулд орон нутгийн захиргаа, Уулчдын үндэсний холбоо хамтран ажиллаж, УИХ-аар батлагдсан албан ёсны нэршлийг түгээхээр болжээ.

Эх сурвалж: Газар зохион байгуулалт, геодези, зураг зүйн ерөнхий газар