Холливудын хамгийн алдартай хосуудын нэг байсан Брэд Питт, Анжелина Жоли нарын гэр бүлийн маргаан салснаас нь хойш 10 жилийн дараа ч үргэлжилсээр байна. Тэдний зургаан хүүхдийн дөрөв нь эцгийнхээ “Pitt” овгийг хууль ёсоор хасуулсан бол үлдсэн хоёр хүүхдийнх нь нэртэй холбоотой өөрчлөлтүүд ч олны анхаарлыг татах болжээ.
Брэд Питт, Анжелина Жоли нар 2004 онд “Mr. & Mrs. Smith” киноны зураг авалтын үеэр танилцсан бөгөөд удалгүй Холливудын хамгийн их анхаарал татсан хосуудын нэг болсон юм. Тухайн үед Питт жүжигчин Женнифер Энистонтой гэрлэсэн байсан бөгөөд 2005 онд тэдний гэрлэлт цуцлагдсан билээ.

Харин Питт, Жоли нарын харилцаа улам дотносож, хэвлэл мэдээллийнхэн тэднийг “Brangelina” хэмээн нэрлэх болсон. Тэд хамтдаа зургаан хүүхэд өсгөж, 2014 онд Франц дахь Château Miraval эдлэнд хуримаа хийсэн юм.
Гэвч тэдний үлгэрийн мэт хайр дурлал удаан үргэлжилсэнгүй. 2016 оны есдүгээр сард Жоли гэрлэлтээ цуцлуулах өргөдөл гаргасан бөгөөд үүний шалтгаан нь Францаас АНУ руу нисэж явсан хувийн онгоцонд болсон маргаантай холбоотой байв.
Жоли тухайн нислэгийн үеэр Питтийг өөрт нь болон хүүхдүүдэд нь хүчирхийлэл үйлдсэн гэж мэдүүлсэн бол жүжигчин эдгээр буруутгалыг няцаасан юм. Холбооны мөрдөх товчоо уг хэргийг шалгасан ч Питтийн эсрэг эрүүгийн хэрэг үүсгээгүй байна.
Ийнхүү хосын салалт хүүхдүүдийн асрамж, эд хөрөнгийн хуваарилалт болон Франц дахь Château Miraval дарсны үйлдвэрийн эзэмшлийн асуудлаар үргэлжилж, найман жилийн турш шүүхийн маргаан дагуулжээ. Улмаар 2024 оны арванхоёрдугаар сард тэд гэр бүл цуцлуулах гэрээнд гарын үсэг зурснаар урт хугацааны ажиллагаа албан ёсоор дууссан юм.

Гэвч гэр бүлийн харилцаа төдийлөн сайжирсангүй. Тэдний охин Шайло 2024 онд 18 нас хүрснийхээ дараа эцгийнхээ овгийг хасуулах хүсэлт гаргаж, Shiloh Jolie нэрээр албан ёсоор бүртгүүлсэн. Харин 2026 онд Захара, Мэддокс болон бага охин Вивьен нар мөн “Pitt” овгийг хасуулжээ.
Тухайлбал, Вивьен 2026 оны арваннэгдүгээр сарын 2-нд овог өөрчлөх хүсэлтээ шүүхээр батлуулснаар Vivienne Marcheline Jolie нэртэй болсон байна. Мөн ихэр ах Нокс сургуулиа төгсөхдөө “Knox Jolie” нэрийг ашигласан нь анхаарал татсан ч овгоо хууль ёсоор өөрчилсөн гэх мэдээлэл одоогоор гараагүй байна.
Нэгэн цагт Холливудын хамгийн хүчирхэг хосуудын нэг гэгдэж байсан тэдний гэр бүлийн харилцаа ийнхүү олон жилийн маргаан, хөндийрлөөр үргэлжилж, хүүхдүүдийнх нь гаргасан шийдвэрүүд ч олны анхаарлын төвд хэвээр байна.



316











