
Холливудын алдарт жүжигчин Энн Хэтэуэй 43 насандаа PEOPLE сэтгүүлээс жил бүр тодруулдаг “World’s Most Beautiful Person 2026” буюу “2026 оны дэлхийн хамгийн үзэсгэлэнтэй хүн”-ээр нэрлэгдлээ. Тэрбээр сэтгүүлийн дөрөвдүгээр сарын тусгай дугаарын нүүрийг чимсэн бөгөөд энэ удаагийн сонголт нь түүний гоо үзэсгэлэнгээс гадна өөрийгөө хүлээн зөвшөөрөх, нас ахихын хэрээр өөрчлөгдсөн үзэл бодлыг нь онцолсноороо анхаарал татаж байна.
Оскарын шагналт жүжигчин Энн Хэтэуэй 20 гаруй жилийн турш Холливудын кино урлагт өөрийн байр суурийг бэхжүүлсэн нэгэн. Тэрбээр “The Princess Diaries”, “The Devil Wears Prada”, “Les Misérables” зэрэг олон бүтээлээрээ үзэгчдийн хайр хүндэтгэлийг хүлээсэн билээ. Гэхдээ Хэтэуэй PEOPLE сэтгүүлд өгсөн ярилцлагадаа өөрийгөө үргэлж өөртөө итгэлтэй байгаагүй гэдгээ хуваалцжээ. Түүний хувьд 40 нас хүрэх үе амьдралыг харах өнцөг, өөртөө хандах хандлагаа өөрчлөх чухал үе байсан аж.
Тэрбээр нас ахихыг зөвхөн залуу насаа алдахтай холбон ойлгох нь өрөөсгөл бөгөөд амьдралын хамгийн аз жаргалтай, үнэ цэнтэй үе заавал залуу насанд тохиох албагүй гэдгийг онцолсон байна. Мөн 40 нас хүрээд өөрт нь амьдралын шинэ эрч хүч, өөр боломжууд нээгдэнэ гэж огт төсөөлөөгүй гэдгээ ярьжээ.
Ярилцлагын үеэр жүжигчин бүсгүй гадаад төрхдөө сэтгэл хангалуун бус байсан нэгэн дурсамжаа ч хуваалцсан юм. Гэр бүлийнхэнтэйгээ амарч явахдаа өөртөө итгэлгүй санагдсан нэг өдөр толь руу хараад “Чи 43 настай шүү дээ” гэж өөртөө хэлсэн байна. Харин өөрийгөө бусдын хүлээлттэй харьцуулахын оронд байгаагаар нь хүлээн зөвшөөрөхөд бүх зүйл өөрөөр мэдрэгдсэн гэжээ.
2026 ОН ТҮҮНИЙ КАРЬЕРЫН ХАМГИЙН ЗАВГҮЙ ЖИЛҮҮДИЙН НЭГ

Энэ жил Энн Хэтэуэйгийн хувьд уран бүтээлийн онцгой жил болж байна. Тэрбээр нийт таван кинонд дүр бүтээж байгаа бөгөөд тэдгээрийн дунд үзэгчдийн хүсэн хүлээсэн “The Devil Wears Prada 2”, найруулагч Кристофер Ноланы “The Odyssey”, “Mother Mary”, “The End of Oak Street”, “Verity” зэрэг бүтээл багтаж байна.
Тэр дундаа “The Devil Wears Prada” киноны анхны ангиас хойш 20 жилийн дараа Энди Саксын дүрдээ эргэн ирж буй нь шүтэн бишрэгчдийнх нь анхаарлыг ихээхэн татаж байгаа юм. Мөн алдарт жүжигчин Мерил Стриптэй дахин нэг дэлгэцнээ хамтрах боломж олдсондоо баяртай байгаагаа илэрхийлжээ.
Өдгөө нөхөр Адам Шулман болон хоёр хүүхдийнхээ хамт амьдарч буй Хэтэуэй энэ жилийн завгүй хуваарийг даван туулахад нөхрийнх нь дэмжлэг онцгой үүрэг гүйцэтгэж байгааг мөн дурдсан байна.

Ийнхүү Энн Хэтэуэй 43 насандаа зөвхөн Холливудын амжилттай жүжигчин төдийгүй өөрийгөө хүлээн зөвшөөрөх, нас ахихаас айхгүй байх тухай үзэл бодлоороо олон хүнд урам зориг өгч байна.
Эх сурвалж: ABC News, PEOPLE, Harper’s Bazaar.


316











