Inditex: Загварын ертөнцийн чимээгүй эзэнт гүрэн

Дэлхийн аль ч томоохон хотын төв гудамжаар алхахад та Zara, Bershka эсвэл Massimo Dutti брэндүүдтэй заавал таарна. Энэ аварга брэндийн ард оршдог Inditex групп болон түүнийг үндэслэгч Амансио Ортегагийн түүх нь орчин цагийн бизнесийн хамгийн сонирхолтой хуудаснуудын нэг юм. Энэхүү эзэнт гүрэн ямар ч үнэтэй сурталчилгаагүйгээр, ердөө "хурд" болон "хэрэглэгчээ мэдрэх" гэсэн хоёр зарчим дээр тогтож, дэлхийн загварын салбарыг бүхэлд нь өөрчилж чадсан юм.

Inditex-ийн даруухан эхлэл

Inditex-ийн түүх 1963 онд Испанийн нэгэн жижиг хотод эхэлжээ. Үүсгэн байгуулагч Амансио Ортега нь төмөр замчны гэр бүлд төрж, бага насандаа ядуу зүдүүгийн зовлонг биеэрээ туулсан нэгэн байв. Тэрээр 14 настайдаа сургуулиа орхиж, орон нутгийн хувцасны дэлгүүрт туслахаар ажиллаж эхэлснээр загварын ертөнцийн анхны мэдэгдэхүүнээ авчээ. Анх гэргий Росалиа Мерагийн хамт гэрийнхээ зочны өрөөнд угаалгын халат оёж бизнесийн гараагаа эхэлсэн тэрээр 1975 онд анхны дэлгүүрээ нээхээр шийджээ. Сонирхолтой баримт дурдахад, тэрээр дэлгүүрээ "Zorba" гэж нэрлэхээр төлөвлөж байсан ч ойролцоо нь ижил нэртэй газар байсан тул хэвлүүлсэн үсгүүдээ ашиглан "Zara" гэх нэрийг зохиожээ. Тухайн үед санамсаргүй сонгосон энэ нэр өнөөдөр дэлхийн өнцөг булан бүрд танигдсан, хамгийн өндөр борлуулалттай, загварын зах зээлийн үнэ цэнийг тодорхойлогч томоохон брэндүүдийн нэг болсон юм.

"Fast Fashion" буюу аянга шиг хурдны нууц

Inditex-ийг бусад өрсөлдөгчдөөс нь ялгадаг гол хүчин зүйл бол тэдний "Түргэн загвар" (Fast Fashion) гэх систем юм. Уламжлалт брэндүүд шинэ загвар гаргах гэж хагас жил зарцуулдаг бол Inditex-ийн дизайнерууд ердөө хоёрхон долоо хоногийн дотор шинэ трендийг загварчилж, үйлдвэрлэн, дэлгүүрийн лангуун дээр тавьж чаддаг. Тэдний 700 гаруй дизайнерууд дэлхийн томоохон шоунууд болон гудамжны загварыг ажиглан, хэрэглэгчид яг юу хүсэж байгааг шууд мэдэрч ажилладаг байна. Долоо хоногт хоёр удаа шинэ бараа ирдэг учраас Zara-гийн үйлчлүүлэгчид жилд дунджаар 17 удаа тус дэлгүүрээр зочилдог гэсэн статистик байдаг нь бусад брэндүүдээс даруй 4-5 дахин өндөр үзүүлэлт юм.

Маркетинггүйгээр байлдан дагуулсан нь

Inditex-ийн нэгэн хачирхалтай баримт бол тэд бараг хэзээ ч ТВ-ийн сурталчилгаа эсвэл гудамжны постерт мөнгө зарцуулдаггүй. Тэд маркетингийн төсвөө зөвхөн хамгийн ашигтай байрлалтай үл хөдлөх хөрөнгө, тансаг зэрэглэлийн дэлгүүрийн тохижилт болон цонхны засалтад зориулдаг. Тэдний хувьд хамгийн сайн сурталчилгаа бол дэлгүүрийн цонхны цаана харагдах сүүлийн үеийн загварууд юм. Мөн тэд хомсдолын тактикийг гайхалтай хэрэгжүүлдэг бөгөөд нэг загварыг маш бага тоогоор үйлдвэрлэж, үйлчлүүлэгчдэд "яг одоо авахгүй бол дуусна" гэсэн сэтгэл зүйн хөшүүргийг чадварлаг ашигладаг байна.

Группийн олон талт байдал ба ирээдүй

Inditex зөвхөн Zara-гаар хязгаарлагдахгүй. Тэд Bershka-гаар дамжуулан өсвөр үеийнхнийг, Massimo Dutti-гээр ажил хэрэгч хүмүүсийг, харин Pull&Bear-ээр чөлөөт хэв маягт дуртай залуусыг өөртөө татаж чадсан. Одоо тус групп байгаль орчинд ээлтэй байх тал дээр ихээхэн анхаарч, 2040 он гэхэд бүрэн "нүүрстөрөгчийн ялгаралгүй" компани болох амбицтай зорилт тавин ажиллаж байна. Үүсгэн байгуулагч Амансио Ортега одоо ч загварын чиг хандлага хэрхэн өөрчлөгдөж байгааг ажиглаж, ажилчидтайгаа нэг хоолны газарт олон нийтийн дунд хооллох дуртай хэвээр байгаа нь энэхүү аварга гүрний даруухан мөртлөө хүчирхэг соёлыг илтгэж байна.

ZARA

Группийн хамгийн том бөгөөд гол хөдөлгүүр нь юм. Zara-гийн үндсэн концепц нь дэлхийн загварын долоо хоногуудын хамгийн сүүлийн үеийн трендийг боломжийн үнээр, маш хурдан хугацаанд хэрэглэгчдийн гарт хүргэхэд оршдог. Эмэгтэй, эрэгтэй болон хүүхдийн загварыг цогцоор нь санал болгодог бөгөөд "Fast Fashion"-ын дэлхийн стандартыг тогтоогч гэгддэг.

Massimo Dutti

Inditex-ийн хамгийн дээд зэрэглэлийн брэнд гэж хэлж болно. Энэ нь Zara-гаас илүү классик, илүү чанартай материал (ноолуур, торго, цэвэр арьс) дээр төвлөрдөг. Зорилтот хэрэглэгчид нь ажил хэрэгч, загварын хувьд тогтвортой бөгөөд чанарыг эрхэмлэдэг хүмүүс байдаг.

Pull&Bear

Залуу үеийнхэнд зориулсан чөлөөт хэв маягийн брэнд юм. Энэ брэнд нь гудамжны соёл, хөгжим, поп урлагийн элементүүдийг загвартаа шингээдэг. Өдөр тутамд өмсөхөд эвтэйхэн, чөлөөтэй атлаа орчин үеийн загваруудыг санал болгодог нь залуучуудын дунд нэр хүндтэй байх үндэс болдог.

Bershka

Pull&Bear-тэй адил залуучуудад зориулагдсан боловч илүү зоримог, "эвент" болон үдэшлэгт зориулсан трендүүдийг чухалчилдаг. Bershka нь технологи, сошиал медиагийн чиг хандлагад маш мэдрэмтгий бөгөөд Gen Z буюу шинэ үеийнхний хамгийн дуртай брэндүүдийн нэг юм.

Stradivarius

Эмэгтэйлэг бөгөөд романтик хэв маягийг илэрхийлдэг брэнд. Тэд залуу эмэгтэйчүүдэд зориулсан илүү зөөлөн, бүтээлч загваруудыг санал болгодог. Энэхүү брэндийн лого нь "Соль" нот байдаг нь тэдний хөгжимлөг, эрчимтэй хэв маягийг бэлгэддэг байна.

Oysho

Дотуур хувцас, гэрийн хувцас болон спортын хувцасны төрөлжсөн брэнд юм. Сүүлийн жилүүдэд Oysho нь иог, гүйлт, фитнесийн өндөр чанартай хувцаснууд дээр илүү төвлөрч, "Activewear" зах зээлд хүчтэй байр суурь эзлэх болсон.

Zara Home

Хувцас загварын чиг хандлагыг гэрийн интерьерт шингээсэн брэнд юм. Гэрийн тавилга, чимэглэл, ор дэрний цагаан хэрэглэл, гал тогооны хэрэгсэл зэргийг минималист атлаа чамин загвараар санал болгодог. Энэ нь хэрэглэгчдэд зөвхөн хувцсаараа бус, амьдарч буй орчноороо дамжуулан гоо зүйн мэдрэмжээ илэрхийлэх боломжийг олгодог.

Э. Баярцэцэг