"БӨРТЭ ЧОНО-2025" наадмын оны онцлохоор “PHYSICAL ASIA TEAM” шалгарлаа

Спортын салбарын оны шилдгүүдийг тодруулдаг "БӨРТЭ ЧОНО-2025" наадам өчигдөр болж, шагналын хураа буулгажээ.

"Бөртэ чоно-2025" наадмын оны онцлохоор “Physical asia team” шалгарлаа. Physical Asia төслийг зохион байгуулсан "Spark" агентлагийн багийн хамт олон сэтгэгдлээ илэрхийллээ:

"Physical Asia" шоугаар дамжуулан Монгол Улсаа дэлхий нийтэд сурталчлах, тэр дундаа Монголын үндэсний спортыг дэлхий нийтэд таниулж гайхуулах зорилготой байсан. Энэ зорилгодоо бага ч болов хүрсэн байх гэж бодож байна. Энэ шоугаар дамжуулан Монголчуудаа сэргээж чадсан, бахархуулж чадсан гэж найдаж байна.

Монгол төдийгүй дэлхий даяар тархан сууж байгаа Монгол үндэстэн ястнуудаа сэргээж, өөртөө итгэх итгэлийг сэргээж чадсан боловуу гэж бодож байна. Энэ нь бид бүхний хамгийн том ялалт байлаа. Тэргүүн дээд шагнал  "Бөртэ-Чоно"-ын эзэн болсондоо нийт баг хамт олныхоо зүгээс маш их баяртай байна.

"БӨРТЭ ЧОНО-2025" НААДМЫН ШИЛДГҮҮД:

• Шилдгийн шилдэг тамирчин Төмөр-Очирын Тулга
• Шилдгийн шилдэг эмэгтэй тамирчнаар Л.Алтанцэцэг
• Шилдэг эрэгтэй тамирчнаар  А.Баттулга, К.Ёолк
• Шилдэг эмэгтэй тамирчнаар П.Орхон, Б.Ганхайч
• М.Цэндбазар шилдэг эмэгтэй  залуу тамирчнаар
• Э.Эрхэс шилдэг эрэгтэй залуу тамирчнаар тус тус шалгарлаа.

Мөн "Бөртэ чоно-2025" наадмын Шилдэг багаар 3х3 сагсан бөмбөгийн шигшээ баг тамирчид шалгарчээ.