Зөгийн балд дуртай, улаан цамцтай бяцхан баавгай Винни Пух энэ жил 100 насныхаа ойтой золгож байна. Бараг нэгэн зууны турш үе үеийн хүүхэд, томчуудын сэтгэлд хоногшсон энэхүү дүрийн түүх 1926 оны аравдугаар сарын 14-нд анх хэвлэгдсэн номоос эхэлжээ.
НЭГЭН БЯЦХАН БААВГАЙГААС ЭХЭЛСЭН ТҮҮХ
Английн зохиолч Алан Александр Милний (A. A. Milne) бичиж, зураач Эрнест Ховард Шепардын (E. H. Shepard) зургаар чимэглэсэн Winnie-the-Pooh ном 1926 оны аравдугаар сарын 14-нд хэвлэгдсэнээр Винни Пух албан ёсоор утга зохиолын ертөнцөд мэндэлсэн юм.
Уг номонд Винни Пух болон түүний найзууд болох Пиглет, Иа, Туулай зэрэг дүрүүдийн хөгжилтэй, адал явдалт түүхүүд гардаг. Тэдний амьдардаг Зуун акр ой (Hundred Acre Wood) хэмээх газар нь хүүхэд насны гэнэн цайлган байдал, нөхөрлөл, төсөөллийн ертөнцийг бэлгэддэг билээ.
Винни Пухын дүрийг бүтээх санаа зохиолчийн хүү Кристофер Робин Милний тоглоомон баавгайтай холбоотой. Түүний тоглоомон амьтад хожим номын дүрүүдийн эх загвар болсон бөгөөд зохиол дахь Кристофер Робин хүү ч бодит амьдрал дээрх зохиолчийн хүүгээс сэдэвлэсэн юм.
ВИННИ ПУХЫН НЭР ХААНААС ГАРАЛТАЙ ВЭ?
Винни Пухын нэр ч бас сонирхолтой түүхтэй. Кристофер Робин Милн Лондонгийн амьтны хүрээлэнд амьдардаг Винни хэмээх хар баавгайд дуртай байжээ. Харин “Пух” (Pooh) гэдэг нэрийг мөн өмнө нь харсан хунгийн нэрнээс санаа авч өгсөн гэдэг.
Ийнхүү бодит амьдрал дахь амьтдаас санаа авсан нэр, хүүхдийн тоглоомон баавгай хоёр нийлж, дэлхий даяар танигдсан дүрийг бүтээсэн байна.
ДЭЛХИЙ ДАЯАР ТАНИГДСАН ДҮР БОЛСОН НЬ
Винни Пухын түүх зөвхөн номын хуудсаар хязгаарлагдаагүй юм. 1961 онд Disney компани Винни Пухын дүрийг ашиглах эрхийг авч, улмаар хүүхэлдэйн кино, телевизийн бүтээлүүдээр дамжуулан дэлхий даяарх үзэгчдэд хүргэсэн билээ.
Өнөөдөр Винни Пух нь хүүхдийн номын алдартай дүр төдийгүй тоглоом, хувцас, бэлэг дурсгалын бүтээгдэхүүн зэрэг олон салбарт танигдсан соёлын бэлгэ тэмдэг болжээ. Түүний хамгийн онцгой чанар нь баатарлаг үйлс бүтээхдээ бус, харин энгийн зүйлээс аз жаргал олж, найз нөхдөө хайрлан, амьдралыг өөрийнхөөрөө хүлээн авдагт оршино.
100 ЖИЛИЙН ДАРАА Ч ҮНЭ ЦЭНЭЭ АЛДААГҮЙ НЬ
Винни Пухыг үе үеийн уншигчдад ойр байлгадаг зүйл нь түүний зөгийн балд дуртай байдал, хөгжилтэй зангаас гадна нөхөрлөл, хайр, амьдралын тухай энгийн атлаа утга учиртай санаанууд юм.
Заримдаа хэт их бодож санаа зовдог, заримдаа юу хийхээ мэдэхгүй будилдаг ч найзуудынхаа төлөө үргэлж санаа тавьдаг энэ баавгай төгс байх албагүй гэдгийг сануулдаг.
1926 онд анх номын хуудсанд гарч ирсэн Винни Пух 2026 онд 100 жилийн ойгоо тэмдэглэж байна. Зуун жилийн турш олон үеийн хүүхэдтэй хамт өсөж, томчуудын дурсамжид үлдсэн түүний түүх нэг зүйлийг харуулна. Зарим дүр хэзээ ч хуучирдаггүй. Учир нь тэдний түгээдэг хайр, нөхөрлөл, аз жаргалын тухай санаа цаг хугацаанаас үл хамааран үнэ цэнтэй хэвээр байдаг.
192
