АНУ-ын Ерөнхийлөгч Дональд Трампын хэвлэлийн төлөөлөгчөөр томилогдсон Кэти Захариа ердөө тав хоногийн дараа албан тушаалаа орхилоо.
Түүний анхны хэвлэлийн бага хурлын тааруу гүйцэтгэлтэй болж, хэвлэл мэдээллийн хэрэгслүүдэд өгсөн ярилцлагууд нь шүүмжлэл дагуулсны дараа Цагаан ордон ийн шийдвэр гаргажээ.
Консерватив үзэл баримтлалтай тайлбарлагч гэдгээрээ Трампын анхаарлыг татсан Захариа мягмар гарагт анхны бөгөөд цорын ганц хэвлэлийн бага хурлаа хийсэн байна. Гэвч тэрээр сэтгүүлчдийн асуултад хариулахдаа бэлтгэсэн бичвэрээ голчлон уншиж, асуулт хариултын хэсгийг ердөө таван минут 30 секундын дараа дуусгажээ.
Үүний дараа түүний хуульч мэргэжилтэй холбоотой асуудал олны анхааралд орсон байна. Ерөнхийлөгч Трамп түүнийг “хуульч” хэмээн тодорхойлсон боловч Захариа хуульчийн мэргэжлийн эрх авах шалгалтад тэнцээгүй гэх мэдээлэл гарчээ. Улмаар тэрээр өөрийн мэргэжлийн замнал, хуульчийн статусаа хэрхэн танилцуулж ирсэн талаар шүүмжлэлд өртсөн байна.
Захариа хэвлэл мэдээллийн хэрэгслүүдэд өгсөн дараагийн ярилцлагууддаа Вашингтоны хэвлэлийнхний өмнө гарахад хангалттай бэлтгэлгүй байснаа тайлбарлан, өөрийгөө өмгөөлөхийг оролдсон ч энэ нь шүүмжлэлийг намжааж чадсангүй.
Хэд хоног үргэлжилсэн хэвлэл мэдээллийн хүчтэй шүүмжлэлийн дараа Трампын захиргаа баасан гарагийн үдээс хойш шийдвэрээ өөрчилжээ. Тухайн үед Дональд Трамп Жоржиа мужид болох завсрын сонгуулийн сурталчилгааны арга хэмжээнд оролцохоор явж байхдаа сэтгүүлчидтэй уулзсан байна. Энэ үеэр тэрээр Захариатай ярилцаж, албан тушаалаа үргэлжлүүлэх эсэхээ дахин бодож үзэхийг зөвлөснөө ярьжээ.
Трамп “Үнэнийг хэлэхэд, би таны оронд байсан бол дахин бодож үзэх байсан” гэж хэлээд, Захариад хандан “Кэти, чамд энэ ажил үнэхээр хэрэгтэй гэж үү? Миний бодлоор чамд хэрэггүй” хэмээн хэлсэн гэжээ.
Ийнхүү Кэти Захариа шинэ албан тушаалдаа ердөө тав хоног ажиллаад ажлаа орхилоо.
Эх сурвалж: The New York Times
256
