SpaceX-ийн 10 дахь туршилтаар Starship пуужин амжилттай хөөрч түүх бүтээлээ

Сүүлийн хэдэн сарын турш хийсэн Starship пуужингийн туршилтууд дэлбэрэлт болон бусад бүтэлгүйтэлтэй нүүр тулгарсны эцэст энэ удаагийн 10 дахь туршилтаар амжилттай хөөрч, газардлаа. Энэ нислэгийн туршилт нь зөвхөн SpaceX-ийн түүхэнд төдийгүй сансар судлалын хөгжлийн дараагийн шатанд гарсан түүхэн алхам болж үлдлээ.

Starship бол одоогоор дэлхийн хамгийн том пуужин буюу 121 метр өндөр, пуужин хөөрөлтийн үед 7,590 тонн хүч гаргах чадвартай юм.

2025 оны наймдугаар сарын 26-ны өдрийн 18:30-д SpaceX компанийн Starship пуужингийн 10 дахь туршилтын нислэг Техасын Starbase-ээс хөөрсөн юм. Энэ удаагийн туршилт нь дэлхийн хамгийн анхны дахин ашиглагдах боломжтой сансрын хөлгийг хөгжүүлэх үйл явцад чухал түлхэц  болсон үйл явдал боллоо.

Нислэгийн үеэр бүх төлөвлөсөн гол зорилтуудыг амжилттай биелүүлж, ирээдүйн Starship болон Super Heavy загваруудыг боловсронгуй болгоход шаардлагатай чухал өгөгдлүүдийг цуглуулсан чадсан байна. Super Heavy пуужин нь бүх 33 Raptor хөдөлгүүрээ асаан амжилттай хөөрсөөр Мексикийн булангийн дээгүүр дээш өгссөн нь томоохон амжилт болов.

Super Heavy бустер төлөвлөсний дагуу ажиллаж Өмнөд Техас мужаас хөөрсний дараа Мексикийн буланд хяналттайгаар усанд буусан. Харин тавдугаар сарын туршилтын үеэр яг энэ оролдлогоороо задарч байсан билээ. Тиймээс анх удаа хиймэл дагуулын туршилтын төхөөрөмж хөөргөж, тойрог замд хөдөлгүүрээ дахин асааж чадлаа.

Энэ амжилт SpaceX-ийн инженерүүдийг сүүлийн  хэдэн сарын бүтэлгүйтлийн дараа баярлуулсан нь мэдээж ч гэлээ компаний байр суурь өмнөх бүтэлгүй туршилтуудын дараах мэдэгдэлтэй ижил хэвээр байлаа. Тэд “Энэ бүхэн бол туршлага” гэх байр суурьтай дараагийн туршилтууддаа анхаарсаар.

Starship хөлөг нь ирээдүйд дэлхий даяар ашиглагдах боломжтой, асар их ачаа зөөвөрлөх чадвартай систем болж хөгжин хүн төрөлхтнийг сар, марс болон сансар огторгуйн цаашдын аялалд хүргэх гол түлхүүр хэмээн тооцогдож байна.

CNN-ийн сэтгүүлч Жэки Уотлсын мэдээлснээр Сүүлийн долоон сарын турш SpaceX дөрвөн Starship туршилтын хөлгөө алдаж, бүгд дэлбэрэлтээр төгссөн нь компанид ихээхэн хүндрэл учруулсан. Энэ бүхний дараа өнөөдрийн нислэг SpaceX-ийн хувьд нэр төрөө бага ч гэсэн сэргээх боломж гэж тооцогдож байна.

Компанийн зорилго бол Starship хөлөг болон Super Heavy хөөргөх пуужинг аюулгүй хөөргөж, дараа нь далайд хяналттайгаар газардуулах явдал. SpaceX энэ удаа шинэчилсэн сайжруулалтууд хийсэн бөгөөд өмнөх алдааг давтахгүй байхаар зорьжээ.

SpaceX-ийн хэлж буйгаар "Туршилтын үндсэн зорилго нь өгөгдөл цуглуулах, Starship-ийн боломжийг дээд түвшинд хүртэл шахах явдал бөгөөд төгс төгөлдөр үр дүнгээс илүүтэйгээр суралцах процесс хамгийн чухал" гэжээ.

Starship бол урьд өмнө бүтээгдсэн том пуужингуудаас хамгийн том нь буюу 121 метр өндөр.  Энэ аварга пуужин хөөрөлтийн үедээ 7,590 тонн хүч гаргах чадвартай.

Сонирхуулахад

• Saturn V (1960-70-аад онд НАСА-гийн Апполоны сарны нислэгт ашигласан): 110 метр өндөр, 3,400 тонн хүч. Starship-ээс хоёр дахин бага.
• ОХУ-ын N1 (сарны уралдааны үеийн томоохон төсөл.): 10 сая фунт хүчтэй (Starship-ээс 40% бага).
• Falcon Heavy (SpaceX-ийн өмнөх хамгийн хүчирхэг пуужин): 70 метр өндөр, 2,300 тонн хүч буюу Starship-ын хүчний гуравны нэг.
• Space Launch System (SLS) (НАСА-гийн шинэ сарны пуужин, 2022 оноос ажиллаж эхэлсэн): 98 метр өндөр, 4,000 тонн хүч буюу С Starship-ын бараг тал нь.

Дараагийн туршилт

Starship-ийн дараагийн туршилтын тов тодорхойгүй ч  гэдээ удахгүй болох төлөвтэй. Илон Маск тавдугаар сард болсон нислэгийн дараа “Дараагийн гурван туршилтын нислэгийг 3-4 долоо хоногийн зайтайгаар хийхээр төлөвлөж байна.” гэж бичсэн. Хэрэв төлөвлөгөө амжилттай болвол 11 дэх туршилтын нислэг есдүгээр сарын сүүлчээр болно.

Эх сурвалж: CNN