Өнөөдөр дэлхийн хамгийн алдартай дүрүүдийн нэг болсон Hello Kitty-г анх хүмүүс төдийлөн тоож байгаагүй. Амгүй, энгийн цагаан муурны зураг хэтэрхий уйтгартай, зах зээлд амжилт олохгүй гэж үзэж байсан гэх түүх бий. Харин хожим энэ дүр дэлхийн хэмжээний үзэгдэл болж, 80 тэрбум ам.долларын орлого олсон энтертайнмент франчайзын нэг болжээ.
47 УДААГИЙН ТАТГАЛЗАЛТ БА НЭГ БОЛОМЖ
Энэ түүхийн гол баатар бол Японы дизайнер Юко Шимизү (Yuko Shimizu). Тэрээр 1970-аад оны эхээр Японы Sanrio компанид ажиллаж байхдаа шинэ дүр бүтээхээр оролдож байжээ.
Цахим орчинд тархсан нэгэн түүхээр түүний зурсан цагаан муурны дүрийг компанийн удирдлагууд 47 удаа буцаасан гэдэг. Учир нь дүр хэтэрхий энгийн, ямар ч сэтгэл хөдлөл илэрхийлдэггүй, хэрэглэгчдийн сонирхлыг татахгүй гэж үзсэн аж.
Харин бодит түүх нь үүнээс дутахгүй сонирхолтой. 1974 онд Юко Шимизү Hello Kitty-ийн анхны загварыг бүтээсэн бөгөөд 1975 онд уг дүр жижигхэн түрийвчин дээр хэвлэгдэн худалдаанд гарчээ. Тухайн үед Hello Kitty нэрээ ч авч амжаагүй, Sanrio-гийн бусад дүрүүдийн нэг байсан юм. Гэвч бүтээгдэхүүн санаанд оромгүй амжилт олсноор компанийн шинэ од болжээ.
ЯАГААД HELLO KITTY АМГҮЙ БАЙДАГ ВЭ?
Hello Kitty-г бусад хүүхэлдэйн дүрээс ялгаруулдаг хамгийн онцлог зүйл бол амгүй төрх нь.
Энэхүү дизайны сонголт нь хэрэглэгчдэд өөрсдийн сэтгэл хөдлөлийг дүрд тусган мэдрэх боломж олгодог. Өөрөөр хэлбэл, баяртай үедээ харвал баяртай, гунигтай үедээ харвал өөрийг нь ойлгож байгаа мэт санагддаг гэсэн санаа юм.
Энэ нь хэл, соёл, насны ялгааг даван дэлхийн өнцөг булан бүрд танигдах нэг шалтгаан болжээ.
ЖИЖИГХЭН ТҮРИЙВЧНЭЭС 80 ТЭРБУМ АМ.ДОЛЛАРЫН БИЗНЕС ХҮРТЭЛ
Hello Kitty-ийн амжилт нэг бүтээгдэхүүнээр хязгаарлагдсангүй. Хожим хувцас, гоо сайхан, тоглоом, үнэт эдлэл, ресторан, аялал жуулчлал гээд олон салбарт нэвтэрч, дэлхийн томоохон брэндүүдтэй хамтран ажиллах болсон юм.
BBC-ийн 2024 онд нийтэлсэн мэдээллээр Hello Kitty нь бүтээгдсэнээсээ хойш 80 тэрбум ам.доллароос давсан орлого оруулсан байна. Энэ нь компанийн зах зээлийн үнэлгээ бус, дүрээс бий болсон нийт хугацааны орлогын тооцоо юм.
Мөн Hello Kitty 2024 онд 50 жилийн ойгоо тэмдэглэсэн бөгөөд өнөөдөр дэлхийн хамгийн танигдсан поп соёлын бэлгэдлүүдийн нэг хэвээр байна.
Сонирхолтой нь, Hello Kitty-г анх бүтээсэн Юко Шимизү 1976 онд Sanrio компаниас гарсан ч түүний бүтээсэн дүрийн алдар нэр жил ирэх тусам улам өссөөр байжээ.
Заримдаа бидний хамгийн энгийн гэж бодсон санаа бусдын хувьд ер бусын үнэ цэнтэй байж болно. Hello Kitty-ийн түүх үүнийг харуулж байна. Дэлхийд танигдахуйц том амжилт заавал сүртэй, нарийн төвөгтэй зүйлээс эхлэх албагүй.
491
