Хүүхэд ажил хийж болох уу? Та юу гэж бодож байна вэ?

Ер нь хүүхэд ажил хийж болдог уу? Энэ асуултыг та өөрөөсөө асуугаад үзээрэй. Хүүхэд ажил хийж болно. Гэхдээ тодорхой хуулийн зохицуулалт, мөрдөх журам, тавигдах нөхцөлүүд бий.

Монгол Улс 2021 онд Хөдөлмөрийн тухай хуулиа шинэчлэн баталж ажил эрхлэлт, хөдөлмөрийн харилцааны суурь зарчимд “хүүхдийн хөдөлмөрийг хориглох, хүүхдийн хөдөлмөрийн тэвчишгүй хэлбэрийг устгах” зохицуулалтыг хуульчилж өгсөн. Ингэснээр Хөдөлмөр нийгмийн хамгааллын сайдын тушаалаар Насанд хүрээгүй хүнийг ажиллуулахыг хориглосон ажлын байрны жагсаалтыг шинэчлэн баталсан юм. Үүнээс заримыг онцолбол:

Хүүхэд ёс суртахуун, хүмүүжилд нь сөргөөр нөлөөлөх:

• Бооцоот уралдаан, интернет мөрийтэй тоглоом зэрэг мөрийцөх, бооцоо тавих бүх төрлийн ажил
• Мансууруулах, сэтгэцэд нөлөөт бодис, тэдгээрийн түүхий эдийг худалдах зэрэг бүх төрлийн хууль бус ажил, үйл ажиллагаа,
• Эротик үзүүлбэртэй холбоотой ажил эсвэл эротик үзүүлбэр үзүүлдэг газар ажиллах;
• Согтууруулах ундаа бэлтгэдэг, худалдаалдаг, түүгээр үйлчилдэг газарт ажил хийж болохгүй.

Мөн:

• Газрын түвшнээс 2 метрээс илүү өндөрт дээвэр, тавцан, тагт, цонх, мод зэрэг дээр ажиллах;
• Цахилгаан, хийгээр ажиллах цахилгаан хөрөө, өрөм гэх мэт машин тоног төхөөрөмжтэй харьцаж ажиллах, цахилгаан үүсгүүр, цахилгаан утастай ажиллах, цахилгаанд цохиулах эрсдэлтэй ажил,
• Галд шатах, дэлбэрэх аюултай   зэрэг аюул учруулж болзошгүй ажил хийхийг хориглодог.
• Бас их дуу чимээтэй, хэт халуун, хүйтэн цаг агаарын нөхцөлд олон цагаар ажиллаж болохгүй. Мөн мал амьтны дайралтад өртөх, өвчтэй мал, шумуул зэрэг амьтдаас зоонозын гаралтай вирус, бактери, паразитын халдвар авах магадлалтай, үхсэн малын сэг, зэмтэй харьцаж ажиллаж болохгүй байх нь ээ. Эдгээр ажлын байр нь хүүхдийн эрүүл мэндэд сөргөөр нөлөөлж болзошгүй тул хориглодог юм байна.

Аль ч улс оронд, ямар ч хүүхэд сайн дураар хөдөлмөр эрхэлдэггүй. Өөрөөр хэлбэл, хүүхдүүд ихэнхдээ ар гэрийн гачигдлаас болж ажил хийдэг. Манай улсад энэ оны байдлаар 58 мянган хүүхэд хөдөлмөр эрхэлж байна гэж Үндэсний статистикийн хорооноос мэдээлжээ. Хүүхэд 15 нас хүрч байж ажил хийх боломжтой, гэхдээ 13 нас хүрээд эрхэлж болох хөнгөн ажил, хөдөлмөрийг мөн хуульчилж өгсөн байдаг.

Хүүхэд ямар ажил хийж бас хийж болохгүй вэ гэдгийг ЭНД-ээс үзээрэй.