Netflix дээрх хоолны ШИЛДЭГ нэвтрүүлгүүд


Миау | YOLO.MN
2020-04-16

Та хоолны нэвтрүүлэг үзэх дуртай юу? Өдөр бүр хийдэг будаатай хуурга, цуйван, гурилтай шөл зэргээсээ өөр, шинэ содон хоол хийж туршмаар байна уу?
Эдгээрийн аль нь ч байсан одоо санал болгох гэж буй нэвтрүүлгүүд танд таалагдана гэдэгт итгэлтэй байна. 

CHEF'S TABLE

"Netflix Originals" цувралуудын нэг болох "Chef's Table" цуврал нэвтрүүлэг нь дэлхийн шилдэг ахлах тогоочдын талаар өгүүлдэг. 

Нийт 6 бүлэг бүхий уг цувралын анги бүрд өөр өөр ахлах тогоочдыг онцлох бөгөөд тэдний бага нас, хоолны арга барил болон амжилтын түүх зэргийг нь харуулдаг. Та энэхүү цувралаас арааны шүлс асгаруулам дүр зургуудтай их олон удаа тааралдах тул үзэж эхлэхээсээ өмнө шүлсээ арчих цаасаа бэлдээрэй. cheeky

STREET FOOD: ASIA

"Chef's Table" цувралтай харьцуулахад "Street Food: Asia" цувралын анги бүрд нэгэн ахлах тогоочийг бус нэгэн улсыг онцолдог.

Япон, Солонгос, Энэтхэг, Тайван, Индонез зэрэг улсын гудамжны хоолнуудад нугасгүй бол энэхүү цувралыг заавал үзээрэй. Мөн онцолж буй хоол бүрээ хангалттай хугацаанд харуулж тайлбарладаг учир тухайн хоолыг хэрхэн хийдгийг сайтар харж аваад гэртээ хийж үзэх боломжтой байдаг. 

Дэлхийд алдартай Ази гудамжны хоолны ертөнцтэй энэхүү цувралаар танилцаарай. 

THE FINAL TABLE

Ихэнх хоолны нэвтрүүлгүүдэд сонирхогчийн түвшний тогоочид ахлах тогоочдоо загнуулахын зэрэгцээ цагтаа амжин "рестораны" түвшний хоол хийх гэж хичээж буй талаар харуулдаг.

Харин энэхүү цувралын хувьд дэлхийд аль хэдийнэ нэрээ цуурайтуулчихсан тогооч нар 2, 2 хүний бүрэлдэхүүнтэйгээр нийт 12 баг болж хоорондоо өрсөлдөнө. Шат ахих бүрд өөр өөр улсын, янз бүрийн хоол хийх шаардлагатай тулгардаг тул ёстой л тогоочдын мэргэжлийн ур чадварыг нь шалгасан нэвтрүүлэг гэж хэлж болно. Уг нэвтрүүлгийг үзээд хийж буй хоолыг нь дагаж хийх гэхээсээ илүүтэйгээр мэргэжлийн тогоочид хэрхэн ажилладаг вэ гэдгийг харж бишрэх нь зүйтэй байх. 

Өөр өөрийн гэсэн онцлогтой, аль хэдийнээ ур чадвараа бусдад таниулаад амжсан тогооч нар хоорондоо хамтран ажиллаж чадах болов уу? 

SALT FAT ACID HEAT

АНУ-ын алдарт тогооч Samin Nosrat өөрийн ижил нэрт хоолны номноосоо сэдэвлэн бүтээсэн "Salt Fat Acid Heat" цуврал нэвтрүүлэгтээ давс, тос, исэллэг, гал зэргийг хэрхэн тохируулан ашиглаж амттай хоол хийх талаар харуулдаг. 

4 ангиас бүрдэх уг цувралын анги болгонд дээрх 4 элементийг онцолж, тухайн элементийг хоол хүнсэнд ашиглах чадвараараа дэлхийд алдаршсан улсуудад зочилж буй талаар харуулдаг. Өөрөөр хэлбэл: 

1. Өөх төс - Оливийн тос, бяслаг, махны талаар өгүүлэх 1-р ангид Итали улсад;

2. Давс - Цуу, мисо шөлний талаар өгүүлэх 2-р ангид Японд улсад;

3. Исгэлэн - Исгэлэн бүтээгдэхүүний талаар өгүүлэх 3-р ангид Мексик улсад;

4. Гал - Хоолыг болгох галын талаар өгүүлэх 4-р ангид тэрээр АНУ-ын Калифорни мужийн Беркэли хотын "Chez Panisse" буюу өөрийнхөө хамгийн анх ажиллаж байсан ресторандаа зочилдог. 

Ерөнхийдөө та хоол гэх ертөнцтэй танилцаад удаагүй, аль эсвэл хоолны талаарх мэдлэгээ улам гүнзгийрүүлмээр байгаа бол энэ цувралыг заавал үзээрэй. 

UGLY DELICIOUS

"Ugly Delicious" нь мөн л "Netflix Originals" цувралын нэг бөгөөд аялал, хоол, түүх гэсэн тэс өөр сэдвүүдийг хослуулсан гайхалтай нэвтрүүлэг юм. Цувралын анги бүрд 1 хоолыг онцлох бөгөөд тухайн хоол хаанаас үүсэлтэй бөгөөд улс бүрд хэрхэн хийгддэг талаар харуулна

Та энэхүү цувралаас пицца, тако, BBQ, шарсан тахиа, амталсан будаа, карри зэрэг хоолнуудыг улсууд хэрхэн өөр өөрсдийн аргаар хийдэг вэ гэдгийг харах боломжтой. Мөн тухайн хоолыг аль таалагдсан улсынхаа жороор гэртээ хийгээд үзэх боломжтой юм шүү. 

FLAVORFUL ORIGINS

Анги бүр нь 12 минутын турш үргэлжлэх "Flavorful Origins" цувралаас та хятад үндэсний хоолнуудыг төгс зураглалтайгаар үзэх боломжтой. Ерөнхийдөө үзээд дагаж хийх гэхээсээ илүүтэйгээр тухайн хоолны үүх түүх, жор болоод бусад мэдээллүүдийг нь авах боломжтой. 

Та эдгээр нэвтрүүлгүүдийг үзэж дууссаны дараа хоол гэдэг нь зөвхөн цадахын тулд хийж иддэг зүйл биш гэдгийг ухаарах болно. Ингээд тухлан сууж, таалан соёрхоно уу. smiley

Эх сурвалж: Insider

#Netflix #Хоол #Нэвтрүүлэг