ЗАХИДАЛ: Миний төлөвлөгөө нурчихлаа

  Yolo.mn сайтын редакц нь ямар нэгэн асуудал тулгарсан уншигч хүүхдүүдээс захиа хүлээн авч мэргэжлийн сэтгэл судлаач болон эмчийн хариу зөвлөгөөг уламжлан хүргэдэг. Ээлжит захиа болон зөвлөгөөг хүргэж байна.

АСУУДАЛ: Миний төлөвлөгөө нурчихлаа 

Сайн байна уу? Намайг А гэдэг. Энэ жил 16 настай охин. Би одоо 12-р ангид орох гэж байгаа болохоор энэ зуныг маш ашигтай өнгөрүүлэхийн тулд төлөвлөгөө гаргаад байсан юм л даа. Гэвч манайх хувийн бизнес эрхэлдэг болохоор намайг тэнд ажилла, эсвэл хөдөө яв гээд хичээл амарснаас хойш ажил хийгээд миний төлөвлөгөө нурчихлаа. Би ийм төлөвлөгөөтэй байна тиймээс одоо давтлагад явъя гэж ээж аавдаа хэлтэл намайг дандаа хичээл гэж явах юм, одоо жоохон боль, аяндаа болно, гэртээ тусал гэсэн утгатай юм хэлсэн. Би дахиад тайлбарласан боловч эгчтэй минь намайг харьцуулж загнаад эрс эсэргүүцээд байна. Би эгчээсээ өөр хүн, түүнээс өөрөөр амьдармаар байна гэдгийг тэд ойлгохгүй байна. Надад урдаа тавьсан том зорилго байхад тэд нураагаад байна. Би яг яах ёстой вэ? Надад зөвлөгөө өгөөч. Баярлалаа.

ЗӨВЛӨГӨӨ: Хамтдаа төлөвлөгөө гаргаарай

Сайн уу? Энэ өдрийн мэндийг хүргэе. Төлөвлөсөн ажил төлөвлөгөөний дагуу явахгүй байна гэдэг үнэхээр бухимдмаар байгааг ойлгож байна. Заримдаа бид цагийг үр бүтээлтэй өнгөрүүлэх гэж байна гээд ажилдаа, карьер хөгжилдөө хэт анхаарч төлөвлөгөө гаргахдаа эргэн тойрны бидний үйл ажиллагаанд нөлөөлөх бусад зүйлсийг дутуу тооцоолсон байдаг. Жишээлбэл, гэр орны ажил, бусдад цаг гаргах/туслах, гэнэтийн найзуудын уулзалт, гэр бүлээрээ хөдөө явах гэх мэт. Тэгвэл хэрхэн энэ асуудлыг шийдвэрлэх вэ?

Үүний тулд дахин нэг нухацтай, эрсдэлээ тооцоолон төлөвлөгөө гаргаад үзээрэй. Гэр бүлдээ цаг гарган, тэдэндээ тусалж, аль аль ажлаа амжуулах нь чухал. Яагаад гэвэл энэ хоёр зүйл хоёулаа тун чухал. Яг одоо гэрийнхэнд нь чиний тусламж хэрэгтэй байна гэж тэд тусламж хүсч байгаа юм байна шүү дээ. Үүний жишээг маш олон алдартнуудын намтраас уншиж болно. Ингээд гэр бүлийнхнээсээ энэ зуны хийх ажлыг дахин бататгаад тэр ажлын хажуугаар чи өөртөө хэрхэн цаг гаргах боломжтойгоо харж тооцоолон төлөвлөх нь үр бүтээмжтэйгээр цагаа ашиглаж, үл ойлголцох бухимдах зүйл бага байна гэдэгт нь итгэж байна. Тиймээс гэрийнхэнтэйгээ тохиролцоорой. Би тусалъя, бас би өөрийгөө хөгжүүлмээр байна гэдгээ хэлээд хамт төлөвлөгөө гаргаарай. Чамайг чадна гэдэгт итгэж байгаа болохоор амжилт хүсье. Ийм их хичээл зүтгэлтэй юм чинь чамайг заавал амжилтад хүрнэ гэж итгэж байна.

Сэтгэл Судлалын Үндэсний Төв

Сэтгэл судлаач

Т.Батзаяа

Хэрэв чамд хэн нэгэнтэй ярилцаж чадахгүй, ганцаараа шийдвэрлэхэд бэрхшээлтэй асуудал байгаа бол yolo@mongolcontent.mn хаяг руу кириллээр, дэлгэрэнгүй, гаргацтай бичиж   цахим шуудан ирүүлснээр бид мэргэжлийн сэтгэл судлаач болон эмчийн зөвлөгөөг хүргэж чамд тус болоход хэзээд бэлэн байх болно. Мөн асуудал бүхий захиан дээрээ өөрийн НАС, ХҮЙСийг тодорхой дурдаарай.