“Хүмүүн бичиг” сонины газраас зохион байгуулсан “Монголын сайхан бичигтэн 2018” улсын уралдаанд 3000 орчим бүтээл өрсөлджээ. Жил бүр уламжлал болон зохиогддог уг уралдаанд сурагчдын ангилалд тэргүүн байр эзэлсэн охин Г.Пүрэвсүрэн бид ярилцлаа. Тэрээр Монгол бичгээ түгээн дэлгэрүүлж яваа өсвөр үеийн төлөөлөл юм.

YOLO: Cайн байна уу? Юуны өмнө баяр хүргэе. Өөрийгөө дэлгэрэнгүй танилцуулаач.

-Баярлалаа. Намайг Ганболдын Пүрэвсүрэн гэдэг. “Хүрээ тулга” бүрэн дунд сургуулийн 11-р ангид суралцдаг. 16 настай.

YOLO: Анх хэзээнээс уран бичлэгээр хичээллэж эхэлсэн бэ?

-9-р ангиасаа хичээллэсэн. Анх манай ээж надад санал болгоод “Содон чимээ” сургалтын төвд Алтантуяа багшаар Монгол бичгээр каллиграфи бичихийг заалгасан. Түүнээс хойш хоёр жилийн дараа уралдаан тэмцээнд оролцож байна.

YOLO: Яагаад уран бичлэгээр хичээллэх болсон бэ?

-Өөрийгөө хөгжүүлэх болон Монголынхоо өв соёлыг түгээн дэлгэрүүлэх зорилгоор хичээллэж эхэлсэн.

YOLO: Анх Монгол бичгээр каллиграфи бичихэд ямар асуудал тулгарч байсан бэ?

-Буруу биччих вий гэж их санаа зовдог байсан. Мөн жоохон л алдаа гаргахад дахиад эхнээс нь бичих хэрэгтэй болдог учир хэцүү үе бий. Уйлж байсан удаа ч цөөнгүй.

YOLO: Тэгвэл эдгээр бэрхшээлүүдээ хэрхэн шийддэг вэ?

-Амттай юм иддэг. Дараа нь анхаарлаа ахин төвлөрүүлээд  шинээр бичиж эхэлдэг.

YOLO: Зарим хүмүүс монгол бичгийг хоцрогдсон бичиг гэж ярьдаг. Чиний бодлоор юу гэж боддог вэ?

-Мэдээж хоцрогдсон бичиг биш. Энэ бол бидний өвөг дээдсээс өвлөгдөж ирсэн бүх зүйлийг харуулж чадсан нэгэн соёл юм.

YOLO: ЕБС-д зааж байгаа Монгол бичгийн хичээл хангалттай төвшинд хүрч чадаж байгаа юу?

-ЕБС-д анх Монгол бичгийг 6-р ангиас зааж эхэлдэг. Миний хувьд манай багш нар сайн заадаг гэж бодож байна. Бусад ЕБС-д ч адилхан байх. Тухайн сурагч өөрөө хичээвэл сурч чадахгүй зүйл монгол бичигт байхгүй.

YOLO: Гаргасан амжилтуудаасаа дурдаач.

-Анх 9-р ангидаа Хэнтийн Батхүүгийн нэрэмжит газар дээр нь шууд бичээд шалгаруулдаг тэмцээнд оролцож тусгай байранд орж байсан. Дараа жил нь дахин ороод мөн адил тусгай байр эзэлсэн. Дараа нь “Монголын сайхан бичигтэн 2017” тэмцээнд сурагчдын ангилалд оролцон 3-р байранд орж энэ жил амжилтаа ахиулан тэргүүн байранд орлоо.

YOLO: Түрүү жил болсон Монголын сайхан бичигтэн тэмцээнээс энэ жилийн ялгарах онцлог юу байв?

-Энэ жил сурагчдын ангилалд илүү олон хүүхэд оролцсон. Үүнээс харахад Монгол бичгээрээ  каллиграфи бичиж өв соёлоо түгээн дэлгэрүүлж байгаа хүүхдүүд улам ихсэж байна. Мөн энэ жил Хөвсгөл аймгийн сурагчид олуулаа оролцсон.

YOLO: Ирээдүйд ямар мэргэжилтэй болно гэж боддог вэ?

-Медиа анимейшнаар суралцаад, хийдэг бүтээлүүдээ анимейшн болгох мөрөөдөлтэй.

YOLO: Бид Монгол бичгээ өдөр тутмын амьдралдаа хэрхэн ашиглаж болох вэ?

-Монгол бичгээр бичсэн сонин сэтгүүл гаргаж болох юм.

YOLO: Монгол бичгээр каллиграфи бичихээс гадна чөлөөт цагаараа юу хийдэг вэ?

-Чөлөөт цагаараа баримлаар бүтээл хийж, зураг зурдаг. Мөн баримлаар хийсэн бүтээлээ уран бичлэгтэйгээ хослуулан бүтээл хийх сонирхолтой болж байгаа.

YOLO: Уран бичгээр хичээллэж эхлэх гэж байгаа хүүхдүүдэд зөвлөгөө өгөөч.

- Тууштай хичээнгүй байх хэрэгтэй. Тэвчээр шаарддаг учир хамгийн гол нь тэвчээртэй байгаарай.

YOLO: Монгол бичгээр уран бичихэд хамгийн сайхан зүйл нь юу вэ?

-Чимээгүй орчинд өөрийн гэсэн бүтээлээ хийгээд суух нь хамгийн сайхан.

YOLO: Чамд тусалж дэмждэг хүмүүст хандаж үг хэлээч.

-Надад тусалж дэмждэг гэр бүл, багш нар, найзууддаа маш их баярлалаа. Цаашдаа илүү хичээх болно оо.

YOLO: Баярлалаа. Цаашдын зорилгод чинь амжилт хүсье.

-Баярлалаа.