ЗАХИДАЛ: Би тэвчих хэрэгтэй гэдгээ мэдэж байгаа ч...

  Yolo.mn сайтын редакци нь ямар нэгэн асуудал тулгарсан уншигч хүүхдүүдээс захиа хүлээн авч мэргэжлийн сэтгэл судлаач болон эмчийн хариу зөвлөгөөг уламжлан хүргэдэг. Ээлжит захиа болон зөвлөгөөг хүргэж байна.

АСУУДАЛ: Би тэвчих хэрэгтэй гэдгээ мэдэж байгаа ч...

Сайн байна уу? Би одоо 13-тай, тэгсэн хэр нь их муухай ааштай. Тоглоом даахгүй хурдан уйлчихдаг, бас их гомдомтгой. Би үүнийгээ ер засаж чадахгүй байна. Гэрт хүмүүс ирээд л дуу шуугиантай байхад ядаргаатай санагдаад байна. Ер нь бүх зүйл ядаргаатай байна. Заримдаа хэн ч байхгүй, чимээгүй газар очоод амьдармаар санагдах юм. Би өөрийгөө тэвчих хэрэгтэй гэдгээ мэдэж байгаа ч гэсэн уурлаад уйлагнаад л... 

ЗӨВЛӨГӨӨ: Өөрийгөө хүлээн зөвшөөрөх нь илүү чухал шүү

Сайн уу? Чамд энэ захиа очих өдрийн мэндийг хүргэе. Хүн бүр хүүхэд наснаас насанд хүрсэн том хүн болох шилжилтийг туулдаг. 13 нас гэдэг бол тэр шилжилтийн үеийн эхлэл. Энэ насанд муухай ааш, хурдан уйлах, бүх зүйл ядаргаатай санагдах зэрэг нь тийм ч ховор зүйл биш. Эдгээр өөрийн ойлгомжгүй байгаа байдлаа хянаж, тэвчиж засах гэж оролдохоос илүүтэй өөрийн байгаа байдлаа эхлээд хүлээн зөвшөөрөх нь илүү чухал шүү.

Үнэхээр хэцүү, ойлгомжгүй үед чамд туслах хэд хэдэн арга зааж өгье:

• Өөрийн юунаас болж, юу мэдрээд буйгаа бичих. Үг, алдаа найруулга зэрэгт санаа зоволтгүй. Зүгээр л толгойд орж ирж байгаа, мэдрэгдэж байгаа бүгдийг бичээрэй.
• Зураг, дуу, шүлэг гэх мэт урлагийн төрлөөр өөрийн мэдрэмжээ мөн илэрхийлж болно.
• Заримдаа уйлах нь тийм ч муу зүйл биш. Уйлж болно.
• Дасгал, бүжиг, дугуй унах гэх зэрэг биеийн хөдөлгөөн хийх нь мөн таагүй мэдрэмжийг багасгахад тустай. Дасгал хийдэг хүүхдүүд сэтгэл хөдлөлөө илүү сайн удирдаж чаддаг.
• Бүх зүйл чиний хүссэнээр болох албагүй гэдгийг хүлээн зөвшөөрөх хэрэгтэй. Гэрт хүн ирэх үед “Надад тухгүй байна. Та нар яв” гэж хэлэх боломжгүй л бол тэдэнтэй хамт байхад суралцаж, өөртөө аль болох эвтэйхнээр цагийг өнгөрөөх хэрэгтэй.
• Эцэст нь хэлэхэд үргэлж тайван байх гэж хичээж өөрийгөө хүчлэхийн оронд зүгээр л өөрийгөө байгаагаар нь байлгаж, хүлээн зөвшөөрөх нь ч бас тустай шүү.

Сэтгэл Судлалын Үндэсний Төв

Туслах сэтгэл судлаач

С.Цолмон

Хэрэв чамд хэн нэгэнтэй ярилцаж чадахгүй, ганцаараа шийдвэрлэхэд бэрхшээлтэй асуудал байгаа бол yolo@mongolcontent.mn хаяг руу кириллээр, дэлгэрэнгүй, гаргацтай бичиж   цахим шуудан ирүүлснээр бид мэргэжлийн сэтгэл судлаач болон эмчийн зөвлөгөөг хүргэж чамд тус болоход хэзээд бэлэн байх болно. Мөн асуудал бүхий захиан дээрээ өөрийн НАС, ХҮЙСийг тодорхой дурдаарай. Жич: Бид мэдээллийг чандлан хадгалах бөгөөд хариуг сайтад нийтлүүлэхийг хүсэхгүй тохиолдолд захидалдаа дурдана уу. Бид хариу зөвлөгөөг 7-10 хоногийн дараа хүргэх болно.