YOLO: Сайн байна уу? Манай уншигчдад өөрийгөө дэлгэрэнгүй танилцуулаач.
- Сайн байна уу. Намайг Э.Түвшинзаяа гэдэг. Би МУИС-ийн нэгдүгээр дамжааны оюутан.

YOLO: Чамайг DIY (Do It Yourself) буюу гар урлалаар маш олон гоё зүйл хийдэг гэж сонссон. Гар урлалыг яагаад сонирхох болсон бэ?
- Бага байхдаа ээж, хоёр эмээтэйгээ цагийг их өнгөрөөдөг байсан. Тэд маань надад маш их зүйлийг зааж өгдөг байсан учир би гараар хийсэн зүйлд хүний сэтгэл их шингэдэг юм байна гэдгийг ойлгосон. Тиймээс л гар урлалаар юм хийх дуртай болсон доо.

YOLO: Яг ямар төрлийн зүйлс урладаг вэ?
- Ихэвчлэн хуучин зүйлсээр шинэ юм хийхийг хичээдэг. Надад хэрэггүй болсон аль эсвэл өмсөхөө больсон хувцас гэх мэт зүйлсээр шинэ содон юм хийдэг. Хуучин зүйлээ яаж өөртөө хэрэгтэй болгон өөрчилж болох вэ гэж бодон урладаг.

YOLO: Гар урлалаар суралцахын давуу тал нь юу вэ?
- Давуу тал гэвэл хүн үүнд сэтгэл зүрхээ зориулж хийдэг болохоор аливаа юманд нямбай ханддаг болно. Нөгөө талаасаа мөнгө хэмнэдэг. Хамгийн гол зүйл нь бүтээлч сэтгэлгээг хөгжүүлдэг юм.

YOLO: Гарын эв дүй сайтай юм чинь юм оёж эсгэхдээ сайн уу?
- Манай найзууд намайг яг юм хийж байх үедээ үнэхээр эв дүйгүй харагддаг гэдэг. Гэхдээ яг хийгээд дууссаны дараа бодол нь өөрчлөгдөж дажгүй харагдаж байна гэцгээдэг. Эсгэх тал дээр нээх сайн биш ч гэсэн би хатгамал оёдог.

YOLO: Ээж, эмээгээсээ их зүйл сурсан гэлээ. Тэгвэл бие дааж өөрийгөө хэрхэн хөгжүүлсэн бэ?
- Өөрөө бол тавдугаар ангиасаа “Youtube”-ээс бичлэг үзэн сурч эхэлсэн. Эцэг эх маань намайг их дэмждэг. Ээж маань намайг дэмий юм хийлээ гэж нэг ч удаа зэмлэж байгаагүй. Харин ч надад маш их зөвлөдөг.

YOLO: Чөлөөт цагаараа урлахаас бусдаар юу хийдэг вэ?
- Есдүгээр ангиасаа эхлэн байт харваагаар хичээллэсэн. Ер нь бол  чөлөөт цагаараа ганцаараа байдаг. Ганцаараа байж шинэ зүйл туршиж үзэх их дуртай.

YOLO: Гар урлалаа хийхдээ шинэ санаагаа хэрхэн олдог вэ?
- Шинэ санаагаа ер нь бол кино үзээд ч юм уу эсвэл эргэн тойрноо ажиглаж байгаад олж авдаг.

YOLO: Ирээдүйд ямар мэргэжилтэй болно гэж бодож байна?
- Бага байхдаа загварын мэргэжлээр явна гэж боддог байлаа. Гэхдээ би бодож үзээд баргийн хүн сонгохооргүй хэцүү мэргэжлээр дээд зэрэг авна гэж бодоод "Хэрэглээний шинжлэх ухаан"-ы салбарыг сонгосон. Ирээдүйд Монгол улсынхаа эрэлт хэрэгцээнд тулгуурлаад нарийн мэргэжилээ нэгээс хоёр жилийн дараа шийднэ. Гар урлалаа хобби болгон авч явна гэж боддог.

YOLO: Хамгийн ойрын зорилго чинь юу вэ?
- Ойрын зорилго гэвэл өөрийн гэсэн "Youtube" хуудастай болох зорилготой байна. Ингэхийн тулд мэдээж надаас багагүй хөдөлмөр шаардагдана.

YOLO: Мөрөөдөл чинь юу вэ?
- Шинжлэх ухааны салбарт өөрийн хувь нэмрээ инженерийн зүгээс оруулахыг хүсдэг.

YOLO: Гар урлалаа хийж байхад чадахгүй зүйл гарвал шантардаг уу?
- Ер нь шантардаг. За одоо больё доо, чадахгүй юм байна гэж их боддог. Гэхдээ шинэ санаанууд олох тусам туршиж үзэхгүй л бол болохгүй юм шиг санагдаад больж чаддаггүй юм.

YOLO: Гар урлалаар хичээллэхийг хүсдэг ч яг яаж хийхээ мэдэхгүй байгаа хүүхдүүдэд зориулж зөвлөгөө өгвөл?
- Яг бичлэг үзээд түүний зааврыг дагаад бас тэрэнд орох эд юмсыг цуглуулна гэвэл хэцүү. Харин түүний оронд эхлээд гэртээ байгаа хуучин зүйлсээ ашиглан шинэ юм хийхийг хичээгээрэй.

YOLO: Ярилцсанд баярлалаа. Хичээл сурлагад нь өндөр амжилт хүсье.